టైగర్ ష్రాఫ్ ఫైరింగ్ కేసులో సంచలన కోణం.. అసలు టార్గెట్ అతను కాదట!

బాలీవుడ్ నటుడు టైగర్ ష్రాఫ్‌పై జరిగిన కాల్పుల కేసు విచారణలో సంచలన విషయాలు వెలుగులోకి వస్తున్నాయి. ఈ దాడిలో నిందితుల ప్రాథమిక లక్ష్యం టైగర్ కాదని, మరో ప్రముఖ నటుడని పోలీసుల ప్రాథమిక విచారణలో తేలింది. ముందుగా అనుకున్న సెలబ్రిటీకి భద్రత ఎక్కువగా ఉండటం, అతడి వద్దకు వెళ్లడం కష్టం కావడంతో నిందితులు తమ ప్రణాళికను మార్చుకున్నట్లు తెలుస్తోంది.

ఈ క్రమంలోనే వారు టైగర్ ష్రాఫ్‌ను లక్ష్యంగా చేసుకున్నారు. టైగర్ అభిమానులు సోషల్ మీడియాలో పోస్ట్ చేసిన కొన్ని రీల్స్ ద్వారా అతనికి పోలీసుల భద్రత లేదని నిందితులు నిర్ధారించుకున్నారు. దీంతో సులభంగా దాడి చేయవచ్చని భావించి, అతడిపై కాల్పులకు తెగబడినట్లు సమాచారం. బాలీవుడ్ పరిశ్రమలో భయాందోళనలు సృష్టించేందుకే ఈ దాడికి పాల్పడినట్లు నిందితులు అంగీకరించినట్లు పోలీసు వర్గాలు తెలిపాయి.

ఆదివారం సాయంత్రం ముంబైలోని జుహు ప్రాంతంలో మోటార్‌సైకిల్‌పై వచ్చిన ముగ్గురు దుండగులు టైగర్ ష్రాఫ్ ప్రయాణిస్తున్న కారుపై కాల్పులు జరిపారు. ఈ ఘటనలో టైగర్ సురక్షితంగా బయటపడగా, అతని డ్రైవర్‌కు గాయాలయ్యాయి. ఘటన జరిగిన కొన్ని గంటల్లోనే రాజస్థాన్‌లోని కోటా రైల్వే స్టేషన్‌లో ముగ్గురు నిందితులను పోలీసులు అరెస్ట్ చేశారు.

ఈ ఘటనపై అమాల్ మాలిక్, మికా సింగ్, విద్యుత్ జమ్వాల్, శత్రుఘ్న సిన్హా, రవి కిషన్‌తో పాటు పలువురు సినీ ప్రముఖులు తీవ్ర ఆందోళన వ్యక్తం చేశారు. టైగర్ తండ్రి జాకీ ష్రాఫ్‌తో మంచి అనుబంధం ఉన్న నటుడు సునీల్ శెట్టి మీడియాతో మాట్లాడుతూ, "యావత్ ప్రపంచం టైగర్, జాకీ దాదాలను ప్రేమిస్తుంది. అలాంటి వారికే ఇలా జరిగితే, ఇక ఎవరికైనా జరగవచ్చు. ఇది చాలా బాధాకరం. టైగర్ ఎప్పుడూ క్రీడలు, వ్యాయామంపైనే దృష్టి పెడతాడు. అలాంటి వ్యక్తికి ఎందుకు ఇలా జరిగిందో అర్థం కావడం లేదు. మనమందరం సురక్షితంగా ఉండటం చాలా ముఖ్యం" అని ఆవేదన వ్యక్తం చేశారు. ఈ కొత్త పరిణామాలతో కేసు విచారణను పోలీసులు మరింత వేగవంతం చేశారు.